பார்த்தசாரதியின் புதிர்கள் - 1307 (17-12-2023) விடைகள்
பக்தி, இசை நிறைந்த மார்கழி இன்று ஆரம்பம். 2006லிருந்து மார்கழி எனக்கும் என் மனைவிக்கும் முக்கியமான மாதம். தினமும் காலை 5.45க்கு வீட்டின் அருகிலுள்ள சத்ய வரதராஜப் பெருமாள் கோவிலுக்குச் செல்வோம். வீட்டிற்கு வந்தபின் அவசரமாக (மனைவி) சமைத்து இருவரும் உண்ட பின் கச்சேரிகள் கேட்க மைலாப்பூர் செல்வோம். இரண்டு கச்சேரிகளாவது கேட்டபின் வீட்டிற்கு வந்தும் Jaya TV, வசந்த் TV என்று கச்சேரிகள் தொடரும். 2016ல் அபாகு (அம்ருதா, பார்த்தசாரதி குறுக்கெழுத்து) மாதம் இருமுறை அமைத்துக் கொண்டிருந்தோம். ஒருமுறை வீட்டு ரிப்பேர்களும் இருந்ததால் குறுக்கெழுத்து அமைக்க முடியவில்லை. அப்போது (டிசம்பர் 2016) நான் எழுதிய 'கவிதை'.
ஆதவன் எழுமுன்னரே திருப்பாவை முப்பதும் தப்பாமே
மாதவன் சத்யவரதராஜனுக்கு வணக்கம் செலுத்தியபின்
கயிலைநாதர் போற்றும் கர்நாடக இசை
மயிலையில் மட்டுமே அதிகம் கிடைப்பதால்
உண்டியாக்கி பிரசாதப் பொங்கலுடன் உண்டபின்
வண்டியெடுத்து ஓடும் எங்களை
பாழும் நேரம் குறுக்கெழுத்து அமைக்க விடவில்லையே
ஏழுநாள் காக்க அன்போடு வேண்டுகிறோம்
இவ்வருடம் சென்னையில் 5 நாட்கள் இருப்பதால் கோவில் நிச்சயம் உண்டு. இன்று 5 மணிக்கு கோவில் சென்று 6.40க்கு வீடு திரும்பினோம். நாளையிலிருந்து 5.30 மணிக்கு. உடல் ஒத்துழைத்தால் தினம் 2 காலைக் கச்சேரிகள் மியூசிக் அகாடமி அல்லது நாரத கான சபாவில் கேட்போம்.
இன்றிலிருந்து நான்கு குறிப்புகளில் ஒன்று திருப்பாவைகளில் இருக்கும் ஏதாவது ஒரு சொல் விடையாக வருமாறு இருக்கும். இன்று ஒன்றாம் திருப்பாவையிலிருந்து. உங்களுக்குத் திருப்பாவை தெரிந்திருக்கத் தேவையில்லை. குறிப்புகளில் இருந்தே solve செய்யலாம்.
